सरकारी फारममा झुठो विवरण भरेपछि कुइन्सल्याण्डमा एक पक्राउ

ब्रिजवेन/सरकारी फारममा झुठो विवरण भरेको भेटिएपछि उत्तर कुइन्सल्याण्ड टाउन्सभिलमा एक पुरुष पक्राउ परेका छन् । उनीमाथी अष्ट्रेलियन फेडरल पुलिस एफपपीले मुद्धा दर्ता गरेको छ । ३७ वर्षीय ती पुरुषले केन्स र टाउन्सभिलको विमानस्थलमा काम गर्न लागि झुठो विवरण भरेको भेटिएको हो । ती पुरुषले विमानस्थलमा काम गर्न चाहिने कार्ड एभिएसन सेक्युरिटी आइडेन्टिफिकेसन कार्ड बनाउनका लागि गलत र झुठा विवरण भरेर पेश गरेको एएफपीले जनाएको छ ।

ती पुरुषले यसअघि आफुमाथी कुनै पनि अपराध पुष्टी नभएको तथा यसअघि कार्डको आवेदन सफल नभएको भन्दै झुठा विवरण भरेका थिए । यो अपराध पुष्टी भएमा १२ महिना जेल सजाय हुनेछ । अष्ट्रेलियामा कुनै पनि क्षेत्रमा झुठो विवरण भर्नु गैर कानुनी मानिन्छ । खासगरी नेपालीहरुले पनि अष्ट्रेलियामा विभिन्न सरकारी कामकाजका लागि बुझाउनुपर्ने कागजपत्रमा झुठा विवरण भर्ने गरेको भेटिएको छ । यसलाई सामान्य मान्दा जेल सजाय हुने डर पनि हुन्छ ।