फागुनको १३ दिनमा मात्रै विभिन्न बैंकहरुले राखे राष्ट्र बैंकमा साढे २ खर्ब बढी निक्षेप

काठमाडौं । कर्जा लगानी विस्तार हुन नसकेर ठूलो पैसा होल्ड भएपछि बैंकहरुले फागुनमा मात्रै साढे २ खर्ब रुपैयाँ भन्दा बढी रकम नेपाल राष्ट्र बैंकमा राखेको पाइएको छ । राष्ट्र बैंकले यही फागुनबाट स्थायी निक्षेप संकलन सुविधा कार्यान्वयनमा ल्याएपछि बैंक तथा वित्तीय संस्थाहरूले दुई खर्ब ५३ अर्ब ६५ करोड रुपैयाँ निक्षेप राखेका हुन ।

राष्ट्र बैंकले यस्तो निक्षेपमा ३ प्रतिशत ब्याज दिएको छ । यसअघि बोलकबोलबाट निक्षेप संकलन गर्दै आएको बैंकले फागुन देखि ३ प्रतिशत ब्याजदरमा बैंकहरुको निक्षेप सिधै राख्न पाउने व्यवस्था गरेको थियो । यो व्यवस्थासँगै अब बैंकहरुले लगानी गरेर बाँकी रहेको सबै रकम केन्द्रीय बैंकमा राख्न पाउनेछन् ।

फागुन २ गते २७ अर्ब ८५ करोड रुपैयाँ, फागुन ६ गते ६० अर्ब, फागुन ९ गते ६९ अर्ब ६५ करोड रुपैयाँ र फागुन १३ मा ९६ अर्ब १५ करोड रुपैयाँ निक्षेप विभिन्न बैंकबाट राष्ट्र बैंकमा जम्मा भएको छ । कर्जा लगानी थप विस्तार हुन नसकिरहेको अवस्थामा यो बचत रकम थप बढ्ने आँकलन गरिएको छ ।