Wednesday, 17 April 2024
जोड्दैछौ अष्ट्रेलियाका नेपाली
HomeAustraliaएनआरएनए अष्ट्रेलियाका ७ सय ५६ नयाँ सदस्य हटाईयो

एनआरएनए अष्ट्रेलियाका ७ सय ५६ नयाँ सदस्य हटाईयो


मेलवर्न/ निर्वाचन नजिकिदै गर्दा गैरआवासिय नेपाली संघ अष्ट्रेलियाको सदस्य बन्न आवेदन दिएका सयौं व्यक्तिको सदस्यता हटाएको छ । यस अघि सदस्यता स्विकृत भइसकेका ७ सय ५६ जनाको सदस्यता मान्य नभएको निर्वाचन समितिले जनाएको छ ।

आज साँझ पत्रकार सम्मेलन गर्दै निर्वाचन समितिका संयोजक टोनु घोतानेले एउटै बैंक कार्डबाट ४ वटा भन्दा बढी सदस्यको रकम शुल्क भुक्तानी गरिएका व्यक्तिहरुको सदस्यता अमान्य भएको र उनीहरुले आगामी चुनावमा भोट हाल्न नपाउने जानकारी दिनुभयो ।

पत्रकार सम्मेलन गर्दै निर्वाचन समिति

यसअघि सन् २०२१ अप्रिल २२ तारिखमा एनआरएनए अष्ट्रेलियाले ४ जना भन्दा बढी व्यक्तिको सदस्यता शुल्क एउटै बैंक कार्डबाट तिर्न नहुने तथा त्यसरी एउटै कार्डबाट त्यसभन्दा बढी व्यक्तिको शुल्क तिरिए उनीहरुको सदस्यता कायम नरहने निर्णय भएको थियो । त्यहि नियम अनुसार नै यसपाली निर्वाचन समितिले बैंक कार्डमाथी कडाई गरेको थियो ।

निर्वाचन समितिले यसअघि नै ३ भन्दा बढी व्यक्तिको सदस्यता एउटै कार्डबाट भए, चौथो व्यक्तिदेखिको सदस्यता मान्य नहुने जिकिर गर्दै आएको थियो ।

त्यसपछि निर्वाचन समितिको निर्णयका पक्ष र विपक्षमा चर्चा भएको थियो । तर, एनआरएनए अष्ट्रेलियाका अध्यक्ष नन्द गुरुङ र महासचिव राजु अधिकारीले विधानको धारा ९ को उपधारा ७ बमोजिमको अधिकार प्रयोग गरेर स्विकृति भइसकेका त्यस्ता सदस्यहरुको सदस्यता अमान्य गरिदिएका हुन् ।

महासचिव अधिकारीले अब एनआरएनए अष्ट्रेलियाको प्रारम्भिक सदस्य १५ हजार २ सय १२ बाट घटेर १४ हजार ४ सय ५६ पुगेको बताउनुभयो । सदस्यता मान्य नभएका सदस्यहरुले विधान बमोजिम शुल्क समेत फिर्ता नपाउने अधिकारीको भनाई छ ।

एनआरएनए अष्ट्रेलियालाई विधान बमोजिम संचालन गर्नका लागि विधानकै अधिकार प्रयोग गरेर यस्तो निर्णय गरिएको महासचिव अधिकारीको भनाई छ । अध्यक्ष र महासचिवको यो निर्णयलाई साधारण सभाबाट मात्रै उल्ट्याउन सकिने व्यवस्था छ ।

एनआरएनए अष्ट्रेलियाको निर्वाचन आगामी जुलाई २९ तारिखमा अनलाईन मार्फत हुदैछ ।

 



यस वेवसाईटमा प्रकाशित समाचार, विचार र लेखबारे तपाईको कुनै प्रतिक्रिया, गुनासो, सुझाव र सल्लाह छन् भने कृपया हामीलाई निम्न ईमेलमा पठाउनुहोला । तपाईको सहयोगले हामीलाई निष्पक्ष र तटस्थ पत्रकारिता गर्न टेवा पुग्नेछ । सम्पर्क इमेल : info@nepaltube.com.au

तपाईको प्रतिक्रिया

ट्रेण्डिङ