कोरोनाका कारण ब्रिजवेनमा तमु ल्होछार कार्यक्रम रद्द, डार्बिनमा भने जनवरी २ मा हुने
ब्रिजवेन, कोरोना संक्रमितको संख्या दिनदिनै बढेसंगै कुइन्सल्याण्डको ब्रिजवेनमा तय भएको गुरुङको ल्होछार कार्यक्रम रद्द गरिएको छ । यसअघि डिसेम्बर ३० तारिखमा नयाँ वर्ष ल्होछारको कार्यक्रम हुने तय भएको थियो । कोरोनाको बढ्दो जोखिमलाई ध्यान दिदै कार्यक्रम रद्द गर्नु परेको तमु कम्युनिटी ब्रिजवेनका अगुवा कमल गुरुङले जानकारी दिनुभयो ।
आफ्नै घरमा सुरक्षित तरिकाले ल्होछार मनाउन पनि सबैमा आग्रह गरिएको छ । कम्युनिटीले पुस १५ कै दिन पारेर ब्रिजवेनमा हरेक वर्ष ल्होछार मनाउदै आएको थियो । तर, कोरोनाका कारण विगत २ वर्षदेखि भने सार्वजनिक स्थलमा ल्होछारको कार्यक्रम हुन सकेको छैन ।
उता नर्दन टेरिटोरीको डार्बिनमा भने जनवरी २ तारिखमा गुरुङहरुले ल्होछारको कार्यक्रम गर्ने भएका छन् । गुरुङ समाज डार्बिनले नेपलिज एशोसियसन अफ नर्दन टेरिटेरी र गैर आवासिय नेपाली संघ नर्दन टेरिटोरीसंग मिलेर ल्होछारको कार्यक्रम गर्न लागेको हो । मलक हिन्दु मन्दिर परिसरमा हुन लागेको कार्यक्रममा गुरुङको परम्परागत नृत्य तथा डोरी तान्ने र घैटो फुटाउने खेल खेलिने समाजले जनाएको छ । रात्री भोजसहितको कार्यक्रममा प्रवेशका लागि वयष्कले ४० डलर र ५ देखि १२ वर्षसम्मकाले २० डलर तिर्नुपर्नेछ ।
गुरुङ अर्थात तमु जातिको नयाँ वर्षलाई ल्होछार भनिन्छ । १२ वटा जनावर रहेको गुरुङ पात्रोमा हरेक वर्ष एउटा जनावरले भोग गर्छ । पात्रो अनुसार पुस १५ मा जनावर परिवर्तन हुने दिनलाई गुरुङहरुले नयाँ वर्षका रुपमा मनाउने गरेका छन् । यसपाली गुरुङहरुले गाई वर्षलाई बिदाई गरि बाघ वर्षलाई स्वागत गर्दैछन् । गुरुङ चलन अनुसार जुन जनावरको बेलामा मानिसको जन्म भयो उसको वर्ग पनि त्यहि जनावरको नामबाट राखिने गरिन्छ । गुरुङ समुदायमा वर्गको महत्व अन्य समुदायको चिना जस्तै हो ।
यो पनि पढ्नुहोस्
लाइभ न्युज
तपाईको प्रतिक्रिया