निर्मला हत्या प्रकरणमा बर्खास्तीमा परेका एसपी विष्टको पुनर्बहाली

काठमाडौं । कञ्चनपुरकी बालिका निर्मला हत्या प्रकरणमा बर्खास्तीमा परेका तत्कालीन कञ्चनपुर प्रहरी प्रमुख प्रहरी उपरीक्षक (एसपी) डिल्लीराज विष्ट प्रहरी सेवामा फर्किएका छन् । मन्त्रिपरिषद् बैठकले विष्टलाई दुई वर्ष अघि गरिएको कारबाही बदर गर्दै पुनर्बहाली गर्ने निर्णय गरेसँगै सेवामा फर्किएका हुन् ।

प्रहरी महानिरीक्षक समेतको टोलीले स्थलगत अध्ययन गर्दा कर्मचारीबाट चरम लापरबाही र गैरव्यवसायिक कार्य भएको देखिएको भन्दै विष्ट र प्रहरी निरीक्षक जगदिश भट्टलाई ८ कात्तिक २०७५ मा बर्खास्त गरिएको थियो । यसअघि प्रकरणमा निलम्बनमा परेका केन्द्रीय अनुसन्धान ब्युरो (सीआईबी) का तत्कालीन डीएसपी अंगुर जिसी, अपराध महाशाखाका डीएसपी दिवेश लोहनी लगायत यसअघि नै सेवामा फर्किइसकेका छन् । ११ साउन २०७५ मा कञ्चनपुरमा बालिका निर्मला पन्तको बलात्कारपछि हत्या भएको थियो ।

प्रहरी अधिकृतहरुविरुद्ध यातना र प्रमाण नष्ट गरेको भन्दै जिल्ला अदालत, कञ्चनपुरमा मुद्दा परे पनि अदालतले प्रहरीकै पक्षमा फैसला गरेको थियो । कारबाहीमा परेका प्रहरी अधिकृतहरु पुनर्बहाली भएपनि घटनाका आरोपित अझै पक्राउ पर्न सकेका छैनन् ।