५० हजार मत कटाए बालेन्द्र साहले, अब ३७ हजार ७ सय मत गन्न बाँकी !

काठमाडौं । काठमाडौं महानगरपालिकाको मेयरका स्वतन्त्र उम्मेदवार वालेन्द्र साह (बालेन) जित नजिक छन् । पछिल्लो मतपरिणामअनुसार बालेनले ५० हजार ३० मत ल्याउँदा दोस्रो स्थानमा रहेर कांग्रेसकी सिर्जना सिंहले ३० हजार ७ सय ६७ मतसहित पछ्याएकी छिन् । त्यस्तै नेकपा एमालेका केशव स्थापित ३० हजार १५ मतसहित तेस्रो स्थानमा छन् ।

मतगणनाको सुरुदेखि नै अग्रता बनाएका बालेनले दोश्रो बन्नुपरेको छैन । बरु मतान्तर बढाउँदै लगेका छन् । सिंहभन्दा १९ हजार २ सय ६३ मतले अगाडि रहेका बालेन अहिले स्थापितभन्दा २० हजार १५ मतले अगाडि छन् । काठमाडौंमा १ लाख ९१ हजार ५५ मत खसेको छ। अहिलेसम्म करिब १ लाख ५३ हजार मत गणना हुँदा अब ३७ हजार ७ सयजति मत गन्न बाँकी रहेको मतगणना अधिकृतले बताएका छन् ।

अहिले वडा नम्बर १३, १४, १५, १६, १८, १९, २० र २१ को मत गणना जारी छ भने वडा नम्बर १७ को मतगणना सुरु नै गरिएको छैन । अन्य वडामा भने मतगणना सम्पन्न भइसकेको छ । यी वडाहरुमा नेपाली कांग्रेस र एमालेले मिश्रित नतिजा ल्याएका छन् । एकिकृत समाजवादी, माओवादी केन्द्र, राप्रपा लगायतका दलको उपस्थिति काठमाडौं महानगरमा निकै कमजोर देखिएको छ ।